Fréttablaðið skýrir frá þessu. Töluvert hefur mætt á Þórdísi Lóu Þórhallsdóttur, formanni borgarráðs og oddvita Viðreisnar, vegna málanna. Sömu sögu er að segja af Dóru BJört Guðjónsdóttur, forseta borgarstjórnar og oddvita Pírata. Þær hafa þurft að svara fyrir málin fyrir hönd meirihlutans en Dagur B. Eggertsson, borgarstjóri, er í veikindaleyfi.
Viðreisn fór í samstarf við síðasta borgarstjórnarmeirihluta að kosningum loknum í vor en í honum voru Samfylkingin, Vinstri græn og Píratar.
Fréttablaðið segir að innan flokksins hafi sú skoðun verið viðruð að flokkurinn eigi ekki að þurfa að svara fyrir illa unnin verk annarra, í þessu tilviki síðasta meirihluta. Flokkurinn hafi ekki komið að þessum málum og eigi því ekki að taka skellinn vegna þeirra.
Fréttablaðið hefur eftir Þórdísi Lóu að margar skoðanir séu ríkjandi innan flokksins og þar sé ekki ein ríkisskoðun sem öllu ráði. Það sé eðlilegt að fólk spyrji spurninga. Viðreisn hafi alltaf sagt að Braggamálið sé alvarlegt.
”Við höfum ekki afsakað eitt né neitt heldur ítrekað að við teljum þetta alvarlegt. Eitt af stefnumálum Viðreisnar er að sýna gagnsæja og agaða fjármálastjórn. Þegar við fréttum af málinu fórum við fyrst fram á skoðun á því og nú síðast heildarskoðun þannig að ekkert verði skilið eftir. Vinnubrögð okkar eru að fá allt upp á borðið og taka síðan yfirvegaða og upplýsta ákvörðun.“
Hefur Fréttablaðið eftir henni.