Mynd dagsins er tekin af árvökulum, geðgóðum og ákaflega kynjajafnréttismeðvituðum íslenskum karlakórssöngvara, á flugvellinum í Stuttgart í Þýskalandi.

Þar má sjá að konur fá sérmerkt bílastæði, líkt og þekkist meðal fatlaðra.

Bílastæðahús Hörpu fór svipaða leið árið 2012, þar sem sama stæðið var merkt bæði með merki fatlaðra, sem og kvennamerkinu.

Í frétt RÚV  frá þeim tíma kemur fram að samkvæmt talsmanni Hörpu, upplifðu konur frekar hræðslu og öryggisleysi í bílastæðahúsum og því væri verið að koma til móts við þær.

Aðrir sögðu þetta niðurlægjandi fyrir konur.

Hinsvegar kom fram hjá Jafnréttisstofu að líklega stæðust slíkar merkingar ekki jafnréttislög, sem banna alla slíka mismunun.

Merkingunum var samstundis breytt í Hörpu í kjölfar fréttar RÚV.