Óttar Yngvason lögmaður biðst afsökunar á ummælum sínum í Kastljósi í gær. Það gerir hann í opnu bréfi til þáttastjórnanda Kastljóss. Ummælin hafa verið harðlega gagnrýnd og Óttar sakaður um rasisma. Líkt og Eyjan greindi frá í morgun eru ummælin eftirfarandi:
„Þetta eru örfáir menn sem eru þarna við störf. Og mest er það nú Pólverjar eða útlendingar.“
Einar Þorsteinsson fréttamaður skaut þá inn: „Þeir þurfa nú líka að vinna.“
„Já já. Þeir geta unnið líka víðar. Og þarna eiga þeir ekki nema bara bráðabirgðaheimili.“
Sjá einnig: Bæjarstjóri sakar Óttar um rasisma – Þetta sagði Óttar orðrétt í Kastljósi
Bréfið má lesa hér fyrir neðan:
„Til Einars, stjórnanda Kastljóss.
Vegna orða minna í Kastljósi í gær vill undirritaður taka fram, að þjóðerni þeirra sem vinna í laxeldi er málefninu óviðkomandi. Ég biðst afsökunar á að hafa ekki orðað þetta betur.
Um leið er rétt að benda á, að starfsmannatölur sem ég nefndi áttu einungis við nýbyrjað laxeldi í Patreksfirði. Aðrar starfsmannatölur sem fram komu áttu augljóslega við meintan heildarfjölda allra eldisfyrirtækja á Vestfjörðum.
Bestu kveðjur,
Óttar Yngvason.“
