Stjórn Landverndar mótmælir fyrirhuguðum áætlunum stjórnvalda um lagabreytingar, í kjölfar ákvörðunar Úrskurðarnefndar umhverfis- og auðlindamála um að fella úr gildi ákvörðun Matvælastofnunar um rekstrarleyfi tveggja fyrirtækja í fiskeldisiðnaði á Vestfjörðum.
Er skorað á ráðherra að fara að lögum:
„Stjórn Landverndar telur það mjög alvarlegt fyrir íslenska stjórnsýslu í umhverfisverndarmálum sem fyrir er mjög veik, að ráðherra skuli hlutast til um úrskurði úrskurðanefndar í umhverfis- og auðlindamálum. Það er ákvörðun og áhætta fyrirtækja að hefja starfssemi þrátt fyrir augljósa ágalla á henni sem varða við landslög, eins og það að kostagreiningin fór ekki fram. Réttur umhverfisverndarsamtaka til þess að láta reyna á framkvæmda- og starfsleyfi fyrir starfssemi sem hefur skaðlegar afleiðingar fyrir umhverfið fyrir óháðum aðila er lítils virði þegar ráðherrar setja lög á úrskurði þessa óháða aðila. Stjórn Landverndar skorar á Sjávarútvegs- og landbúnaðarráðherra og Umhverfis- og auðlindaráðherra að virða niðurstöðu úrskurðanefndarinnar og láta af áætlunum um lagasetningar sem snúa úrskurði hennar. “