Útgerðarfélag Reykjavíkur, sem áður var Brim, er hætt við sölu á félaginu Ögurvík til HB Granda fyrir 12,3 milljarða. RÚV greinir frá.
Ákvörðunin er tekin vegna þess að lífeyrissjóðurinn Gildi, sem er hluthafi í HB Granda, óskaði eftir óháðu mati á því hvort viðskiptin væru í raun hagstæð fyrir HB Granda.
Guðmundur Kristjánsson, eigandi ÚR og Ögurvíkur, er einnig stærsti hluthafi HB Granda. Samkeppniseftirlitið hefur haft viðskiptin til skoðunar,
Samkvæmt bréfi Runólfs V. Guðmundssonar, framkvæmdarstjóra ÚR, til HB Granda, kemur fram að tillaga Gildis sé um fjórða óháða verðmatið á Ögurvík, sem sýni að efasemdum um að viðskiptin séu gerð á grundvelli armslengdarsjónarmiða, hafi ekki verið eytt.
Þá sé það vilji ÚR að fara ekki í viðskiptin með Ögurvík að þessu sinni, í ljósi reynslu og þekkingar ÚR á minnihlutavernd, deilum hluthafa og einlægum vilja forsvarsmanna félagsins til að starfa í sátt og samlyndi og án átaka við aðra hluthafa þeirra félaga sem ÚR er einnig hluthafi í.
„ÚR telur það ekki skynsamlegt að knýja viðskiptin í gegn á þessum tímapunkti gegn efasemdum (vilja) eins af stærri hluthöfum í HB Granda,“
segir í bréfinu.