Ætli sé nokkur vafi um að fundin verður leið framhjá niðurstöðu úrskurðarnefndar um umhverfis- og auðlindamál um laxeldið í Tálknafirði og Patreksfirði. Eða er það ekki alveg öruggt?
Í dag er hann mjög stríður í fjölmiðlum söngurinn um að þessu verði að breyta – einn vinur minn á Fésbók orðar það svo að allir fjölmiðlar séu nú „fullir af fréttum um að heimsendir sé í nánd ef ekki má ala lax í opnum kvíum“.
Þrýstingurinn er mjög mikill, eins og sjá má á greininni hér að neðan. En það sýnir hvernig himinn og haf er milli andstæðinga og stuðningsmanna eldisins að fjöldi starfanna sem tapast vegna úrskurðarins er áætlaður allt frá örfáum upp í fjögur hundruð, allt eftir því hver fjallar um málið.
Meira og minna allir flokkar á þingi virðast vera sammála um að þurfi að bregðast við úrskurðinum og það er sjávarútvegsráðherra líka og forsætisráðherra. Einna harðast gengur fram Lilja Rafney Magnúsdóttir, þingmaður Vinstri grænna – jú, hún er að vestan.
Það er samt spurning hvernig umhverfisflokkurinn VG á að taka á þessu máli – og sjálfur umhverfisráðherrann, Guðmundur Ingi Guðbrandsson, sem var sóttur frá náttúruverndarsamtökum úti í bæ. Hann hefur lýst því yfir áður að hann vilji fara með mikilli gát í laxeldi.
Úrskurð nefndarinnar virðist ekki vera hægt að sniðganga – málarekstur fyrir dómstólum tekur langan tíma. Hvernig ætlar þá forsætisráðherra að bregðast við – í gær gaf hún út þessa varfærnu yfirlýsingu.