Ríkisútvarpið birti í fréttum í gær sundurliðaðar tölur vegna framkvæmda við braggann umdeilda í Nauthólsvík. Endurbygging hans átti að kosta 158 milljónir en nú er kostnaðurinn kominn í 415 milljónir og ekki öll kurl komin til grafar. Sagði í fréttinni að kostnaðurinn væri um 900 þúsund krónur á fermetrann.
Tölurnar eru sláandi. Það er eins og allir sem koma að framkvæmdunum hafi keppst við að skila sem hæstum reikningum og þeir hafi svo verið samþykktir inni í Ráðhúsi án þess að nokkur athugasemd væri gerð. Maður sem ég ræddi við og þekkir vel til í húsbyggingum og endurgerð gamalla húsa sagði að sumir reikningarnir væru margfaldir á við það sem búast mætti við.
Sjálfum er mér dálítið brugðið – ég þarf að ráðast í talsverðar viðgerðir á gamla húsinu sem ég bý í. Ef kostnaðurinn verður eitthvað í líkingu við þetta er greinilegt að ég þarf strax að segja mig til sveitar.
En í alvöru talað – meirihluti borgarstjórnar hafnar því að málið fari í óháða rannsókn heldur vísar því til „innri endurskoðunar“. En þegar maður sér tölurnar veltir maður fyrir sér hvort þetta sé ekki frekar lögreglumál?
Svona litu tölurnar út í sjónvarpinu í gær. Maður rekur strax augun í fyrstu töluna, ástandsskoðun – 27 milljónir. Veskú!