Ásmundur Friðriksson, þingmaður Sjálfstæðisflokksins, segir að sér hafi ofboðið mótmælaspjald sem notað var á mótmælafundi ljósmæðra í vikunni. Tilefni ummælanna er mynd sem birtist á forsíðu Fréttablaðsins af undirbúningi mótmælafundarins. Í Facebook-færslu fyrir helgi skrifaði Ásmundur um myndina að ljótleiki kjarabaráttunnar ætti engin takmörk.

Í þættinum Vikulokin á Rás 1 í dag var Ásmundur spurður út í þessi ummæli og sagði hann:

„Mér fannst myndbirting á forsíðu Fréttablaðsins, þar sem ófrísk kona var að búa til mótmælaspjald þar sem á stóð „Helvítis fokking fæðingar“, að segja svona um fallegasta hlut sem hver kona, fjölskylda og foreldrar upplifa, það fallegasta sem guð gaf okkur – fæðingin – að einhverjum detti í hug að nota svona orðbragð í kjarabaráttu, ég bara á ekki til orð yfir það. Að fólk láti sér slíkt um munn fara um þetta fallega sköpunarverk sem við erum öll hluti af.“

Aðrir gestir þáttarins tóku að nokkru leyti undir með Ásmundi þó að þeir kvæðu ekki eins sterkt að orði. Gissur Pétursson, forstjóri Vinnumálastofnunar, sagði þetta til marsk um að samfélagsumræðan væri orðin hömlulausari en hún var og fólk leyfi sér að setja hlutina fram á grófari hátt en áður.