Hæfnisnefnd um stöðu aðstoðarseðlabankastjóra hefur valið fimm umsækjendur hæfasta í starfið og skilað niðurstöðum sínum til forsætisráðherra, Katrínar Jakobsdóttur. Alls ellefu komu til greina. Frá þessu var greint í Viðskiptablaði Morgunblaðsins.
Í efsta flokkinn „mjög hæfir“ völdust dr. Daníel Svavarsson, forstöðumaður hagfræðideildar Landsbanka Íslands, Guðrún Johnsen, lektor og doktorsnemi í hagfræði, Jón Þór Sigurgeirsson, framkvæmdastjóri alþjóðasamskipta við SÍ, Rannveig Sigurðardóttir, aðstoðarframkvæmdastjóri hagfræði- og peningastefnusviðs SÍ, og Þorsteinn Þorgeirsson, ráðgjafi seðlabankastjóra.
Þeir dr. Tryggvi Guðmundsson, hagfræðingur og fulltrúi Alþjóðagjaldeyrissjóðsins í London, og Vilhjálmur Bjarnason, hagfræðingur og fyrrum alþingismaður Sjálfstæðisflokksins, töldust „vel hæfir“.
Í flokknum „hæfir“ völdust þeir Konráð S. Guðjónsson, hagfræðingur Viðskiptaráðs Íslands, dr. Lúðvík Elíasson, starfsmaður Seðlabanka Íslands, dr. Ólafur Margeirsson, sérfræðingur hjá Zurich Insurance, og Stefán Hjalti Garðarsson, reikniverkfræðingur og frumkvöðull.
Í hæfnisnefndinni eru:
Friðrik Má Baldursson, prófessor við Háskólann í Reykjavík, formaður. Hann er skipaður í nefndina af forsætisráðherra án tilnefningar.
Þórunn Guðmundsdóttir, hæstaréttarlögmaður og varaformaður bankaráðs SÍ sem skipuð er samkvæmt tilnefningu bankaráðsins, og Eyjólfur Guðmundssson, rektor Háskólans á Akureyri, sem skipaður er samkvæmt tilnefiningu samstarfsnefndar háskólastigsins.
Skipað verður í embætti aðstoðarseðlabankastjóra þann 1. júlí næstkomandi, en þá rennur út síðara skipunartímabil Arnórs Sighvatssonar, aðstoðarseðlabankastjóra, sem náð hefur hámarkstíma þeim sem sitja má í
embættinu lögum samkvæmt.
