Fyrsta skrefið í átt að breytingum á KR-svæðinu við Frostaskjól og Kaplaskjólsveg var tekið í síðustu viku, þegar samþykkt var í borgarráði verklýsing á breytingum í aðalskipulagi Reykjavíkur fyrir KR-svæðið í Vesturbænum. Er það í samræmi við viljayfirlýsingu borgarinnar og KR frá því í nóvember í fyrra.
Kynntar hafa verið frumteikningar af svæðinu á íbúafundum. Stefnt er að því að svæðið verði blanda af íbúðum, atvinnustarfssemi, samfélagsþjónustu og verslunarstarfssemi.
Frumtillögur gera ráð fyrir 32.000 fermetra aukningu í byggingarmagni. Um 12.000 fermetra aukning verður á knattspyrnusvæðinu, en um 4200 sætum verður bætt við í stúkum umhverfis KR-völlinn sjálfan. Þá verða um 10.000 fermetrar til fyrir minni íbúðir og aðrir 10.000 fermetrar undir þjónustu.
Áætlað er að lokaafgreiðsla tillögunnar að lokinni auglýsingu verði um mánaðarmótin september/október næstkomandi.
Arkitektarnir Bjarni Snæbjörnsson og Páll Gunnlaugsson hafa unnið að verkefninu með KR og eru tölvumyndirnar hér að neðan, þeirra.
