Samkvæmt könnun Fréttablaðsins er Sjálfstæðisflokkurinn í Garðabæ í nokkuð góðum málum nú sem endranær. Hann fengi átta fulltrúa kjörna af 11, með 63 prósenta fylgi, samkvæmt könnuninni. Næstur kemur Garðabæjarlistinn, með 23,5 prósent og þrjá menn kjörna. Þá kemur Miðflokkurinn með 4,5 prósent og Framsóknarflokkurinn fær 1,5 prósent, en hvorugur þeirra nær inn manni.
Garðabæjarlistinn er sameinaður fólki úr Samfylkingunni, Vinstri grænum, Bjartri framtíð, Viðreisn, Pírötum og óháðum.
Í kosningunum 2014 hlaut Sjálfstæðisflokkurinn 58,8 prósent atkvæða og sjö menn kjörna og staða flokksins því ansi sterk þrátt fyrir hið sameinaða framboð Garðabæjarlistans.
Sameining framboðanna, ásamt viðbót VG, Pírata og Viðreisnar, virðast því hafa lítil áhrif á Garðbæinga ennþá. Hinsvegar skal horft til þess að tæp 19 prósent sögðust óákveðin og rúm 17 prósent vildu ekki svara könnuninni.
Hringt var í 778 manns með lögheimili í Garðabæ þar til náðist í 652 samkvæmt lagskiptu úrtaki dagana 7. og 8. maí. Svarhlutfallið var 83,8 prósent. Þátttakendur voru valdir með slembiúrtaki úr þjóðskrá. Svarendur skiptust jafnt eftir kyni og hlutfallslega eftir aldri. Alls tóku 54,3 prósent þeirra sem náðist í afstöðu til spurningarinnar. Þá voru 9,3 prósent sem sögðust ekki ætla að kjósa eða ætla að skila auðu, 18,9 prósent sögðust óákveðin og 17,5 prósent vildu ekki svara spurningunni.