Markaðsvirði Haga hefur lækkað um 18,6 milljarða frá því að verslun Costco opnaði fyrir rúmum tveimur mánuðum. Þegar markaðir lokuðu á föstudaginn stóð gengi Haga, sem reka meðal annars Bónus og Hagkaup, í 39,4 krónum á hlut sem er 28,7% verðlækkun frá gengi Haga daginn sem að Costco opnaði verslun sína í Kauptúni í Garðabæ. Greint er frá þessu í Fréttablaðinu í dag.
Eftir lokun markaða á föstudaginn sendu Hagar frá sér afkomuviðvörun annan mánuðinn í röð. Þar kom fram að EBITDA félagsins verði um fimmtungi lægri fyrir annan ársfjórðung ársins heldur en var fyrir ári síðan. Í afkomuviðvöruninni kom fram að unnið væri að miklum breytingum á verslun Hagkaups í Kringlunni og að lokun efri hæðarinar í febrúarlok hafi haft áhrif á veltu félagsins. Þar að auki stæðu yfir breytingar á verslun Zöru í Smáralind. Þær breytingar hefðu áhrif á sölutekjur og kostnað þar til að verslanirnar opna á ný í október. Unnið væri að hagræðingu og að bæta verslanir og þjónustu við neytendur til að takast á við breytt samkeppnisumhverfi.
Frá því að Costco opnaði hefur nánast verið stöðugt annríki í versluninni og var nýliðin verslunarmannahelgi engin undantekning. Þegar blaðamann bar að garði um miðjan dag á laugardag voru öll bílastæði fyrir utan Costco upptekin og þurftu því viðskiptavinir Costco að fyrir utan verslun Bónus, sem er einnig í Kauptúni.