Ómar Svavarsson hefur verið ráðinn forstjóri Securitas. Hann tekur við starfinu af Guðmundi Arasyni sem lætur af störfum eftir að hafa starfað hjá félaginu um árabil. Þetta kemur fram í fréttatilkynningu.
Ómar var framkvæmdastjóri sölu og ráðgjafar hjá Sjóvá. Hann var áður forstjóri Vodafone á árunum 2009 til 2014. Ómar er viðskiptafræðingur með Cand Oecon frá Háskóla Íslands.
Guðlaug Kristinsdóttir stjórnarformaður Securitas segir við tilefnið:
Starfsemi Securitas er að taka miklum breytingum með aukinni áherslu á upplýsingatækni og rafrænni þjónustu við viðskiptavini. Það er því mikill fengur fyrir félagið að fá Ómar til liðs við okkur sem hefur umfangsmikla reynslu af störfum á fjarskipta‐ og tryggingamarkaði þar sem þróunin í tækni og þjónustu hefur verið hvað örust. Við bindum miklar vonir við að ráðning hans muni enn frekar tryggja stöðu Securitas sem leiðandi fyrirtæki á sínu sviði á tímum örra breytinga og þróunar á markaði. Ómar tekur við öflugu og sterku félagi og ég vil fyrir hönd stjórnar félagsins þakka fráfarandi forstjóra Guðmundi Arasyni fyrir að hafa leitt uppbyggingu félagsins og stýrt því farsællega í gegnum ýmsar áskoranir á undanförnum árum. Nýr forstjóri tekur við góðu búi.