Orðið á götunni hefur lengi verið það, að senn riði WOW-veldi Skúla Mogensen til falls. Illa gangi að finna fjármagn til afborgana á flugvélakaupum, meðal annars vegna þess að ekkert hafi gengið að selja eignir félagsins TF-KEF á Ásbrú, í eigu Skúla Mogensen, sem keyptar voru árið 2016. Þær hafa nú verið teknar úr sölu, en þrír milljarðar áttu að fást fyrir þær fasteignir. Þá reyndust afkomutölur WOW fyrir 2017 verri en við var búist og hækkandi eldsneytisverð og harðnandi verðsamkeppni gefa lítið tilefni til áframhalds á þeirri bjartsýni sem einkennt hefur forstjórann hingað til.
Til að mynda fagnaði Skúli fimmtugsafmæli sínu þann 4. ágúst síðastliðinn, þó afmæli hans sé ekki fyrr en 18. september. Illar tungur segja Skúla hafa tekið ákvörðunina um að fagna afmælinu meðan fjárhagsstaðan enn leyfði, en það verður þó að teljast ólíklegt.
Orðið á götunni er nefnilega að Skúli hafi víða leitað fanga til þess að rétta af stefnuna hjá WOW. Menn með blátt blóð í æðum, frá botni Miðjarðarhafs, eru sagðir koma Skúla til bjargar, líkt og prinsar á brúnum úlfalda.