Orðið á götunni er að Páll Magnússon, þingmaður Sjálfstæðisflokksins, hafi uppfyllt gamlan draum nýverið, er hann brá sér í hlutverk bæjarstjóra Vestmannaeyja. Tekið skal fram að um sviðsetningu fyrsta fundar bæjarstjórnar Vestmannaeyja eftir Eyjagosið, þann 23. janúar 1973, var um að ræða. Tilstandið var af tilefni þess að gera á heimildarmynd um Eyjagosið og var Páll fenginn til þess að leika föður sinn, Magnús Magnússon, sem var bæjarstjóri Vestmannaeyja frá 1966-1975, enda sterkur svipur með feðgunum.
Páll greinir frá þessu á samfélagsmiðlum og kemst þannig að orði, að þetta sé eflaust það næsta sem hann komist að verða bæjarstjóri í Vestmannaeyjum. Hinsvegar segir Páll einnig: „En, halló, eru ekki kosningar á laugardaginn?!“
Sem kunnugt er þá styður Páll ekki Sjálfstæðisflokkinn í Vestmannaeyjum, heldur klofningsframboðið Fyrir Heimaey, sem leitt er af Írisi Róbertsdóttur, fyrrum varaþingmanni Sjálfstæðisflokksins. Páll, sem gat ekki hamið vonbrigði sín með að fá ekki ráðherrastól í síðustu tveimur ríkisstjórnum, er sagður vonlítill um frekari frama innan flokksins. Því hugsi hann sér gott til glóðarinnar, því krafa klofningsframboðsins er sögð sú að gera Pál að bæjarstjóra.
Orðið á götunni er að orð Páls hér að ofan séu staðfesting á því.