Orðið á götunni er að Davíð Oddsson ritstjóri Morgunblaðsins sé alls ekki höfundur Staksteina Morgunblaðsins eins og margir hafa haldið allt frá því Davíð tók við sem ritstjóri blaðsins árið 2009. Þess í stað sé það Karl Blöndal aðstoðarritstjóri sem sé iðulega sá sem skrifi Staksteina og marga leiðara blaðsins sem túlka má sem „harðasta hægrið“. Það eina sem Davíð geri á Morgunblaðinu sé að koma af og til í heimsókn á skrifstofuna og skrifa stundum Reykjavíkurbréf.
Þessar upplýsingar hljóta að vera vonbrigði fyrir þá sem taka Staksteinum sem heilagri ritningu og nota þá til að móta eigin skoðanir. Þetta vekur einnig spurningar um afrakstur vinnu þar sem Davíð er ritstjóri með nærri fjórar milljónir á mánuði þegar það er í raun Karl Blöndal sem sér um að koma málstað Moggans á framfæri, það væri kannski ráð fyrir Karl að koma út úr skápnum sem Staksteinahöfundur þó það væri aðeins til að láta nafn sitt bera á góma þegar kemur að því að finna eftirmann Davíðs.
Eini sem uppfyllir kröfurnar til að verða ritstjóri Morgunblaðsins, þ.e.a.s. að mæta illa til vinnu, eiga aðdáendur sem fylgja öllu sem viðkomandi segir í blindni og telja að 13,7% sé „gott kjörfylgi“, er Sigmundur Davíð Gunnlaugsson. Það er aldrei að vita nema hann slái til á næstu tíu árum, því nóg er til af kvótapeningum til að niðurgreiða tapið.