„Ég er einn af þeim sem ákváðu að hætta við og fresta útgáfu bókarinnar vegna þess að andrúmsloftið í samfélaginu var lævi blandið og umræðan um höfundinn drifinn áfram af hatri sem varhugavert er að fara á fjörurnar við.“
Þetta segir Þröstur Ólafsson hagfræðingur og fyrrverandi framkvæmdastjóri verkamannafélagsins Dagsbrúnar í grein á Kjarnanum. Greinin er stuðningsyfirlýsing við Jón Baldvin Hannibalsson sem hefur ítrekað verið sakaður um kynferðisofbeldi og kynferðislega áreitni af fjölda kvenna. Þröstur er einn af þeim sem stóð að útgáfu og söfnun afmælis heillaóska þar sem einnig átti að fjalla um pólitískan feril Jóns Baldvins en Þröstur telur Jón Baldvin vera einn af merkustu stjórnmálamönnum liðinnar aldar og eini stjórnmálamaðurinn sem sé virtur og dáður erlendis.
Þröstur segir að nú sé nóg komið af árásum og líkir máli Jóns Baldvins við ýmsa þekkta menn í mannkynssögunni, eins og Jesú. Þröstur segir að allt hafi sinn tíma og takmörk. Markmiðið sé ekki að koma höggi á Jón Baldvin, heldur leggja hann að velli, ræna hann ærunni og gera hann útlægan hér á landi.
„Þá var oft vitnað til lýðsins sem hrækti á Krist og fékk hann krossfestan. Göbbels hafði rétt fyrir sér. Ef klifað er nógsamlega á sömu fullyrðingunni, þótt uppspuni sé, verður henni trúað.“
„Ég er einn af þeim sem telur að nú sé komið nóg. Allt hefur sinn tíma og sín takmörk. Líka mannorðsherferð,“ segir Þröstur og bætir við á öðrum stað um bókina sem aldrei kom út:
„Bókin átti að vera þessi þakklætisvottur. Alþekkt er að háar byggingar varpa af sér löngum skugga.“
