Í tilefni af fréttaflutningi undanfarið um harðar ásakanir milli borgarritara og borgarfulltrúa minnihlutans undanfarið hefur Starfsmannafélag Ráðhúss Reykjavíkur sent frá sér yfirlýsingu þar sem segir að halda eigi starfsfólki borgarinnar utan við pólitíska umræður:
YFIRLÝSING
Stjórn starfsmannafélags Ráðhúss Reykjavíkur áréttar að ekki eigi að gera starfsfólk Reykjavíkurborgar og störf þess að opinberu umtalsefni í pólitískum tilgangi. Í stjórnsýslu borgarinnar starfar fólk sem þykir vænt um vinnuna sína og vinnur af heiðarleika og einlægni að hag borgarbúa út frá ákvörðunum og stefnu borgarstjórnar hverju sinni.
Stjórnin minnir á að möguleikar starfsfólks til þátttöku í umræðunni og til þess að koma störfum sínum til varnar eru mjög takmarkaðir.
Óskað er eftir því að starfsfólk fái frið til að vinna vinnuna sína án þess að störf þess séu gerð tortryggileg og án þess að vera blandað í stjórnmálaumræðu sem á með réttu að eiga sér stað á milli kjörinna fulltrúa og á pólitískum vettvangi.
Guðbjörg Lára Másdóttir, Tómas Ingi Adolfsson, Rósa Björg Borgþórsdóttir, Tinna Garðarsdóttir, Bjarni Þóroddsson, Baldur Örn Arnarson, Oddrún Helga Oddsdóttir.