Það kæmi Gústaf Níelssyni ekki á óvart ef Dagur borgarstjóri yrði fyrsti íslenski stjórnmálamaðurinn sem lenti í fangelsi fyrir spillingu. Gústaf hefur lengi verið viðloðandi stjórnmál, meðal annars fyrir Þjóðfylkinguna og Framsókn, en langþekktastur er hann fyrir að vera bróðir Brynjars Níelssonar sem hefur náð talsvert meiri frama á hinu pólitíska sviði, og hefur skuggi Brynjars aðeins stækkað með árunum.

Gústaf lætur ýmislegt flakka á samfélagsmiðlum. Hann deilir frétt Viljans en í henni segir að á sama tíma og vanti um átta þúsund íbúðir í Reykjavík til að mæta eftirspurn á markaðnum sé Reykjavík full af tómum lúxusíbúðum. Gústaf varpar þeirri spurningu fram hvort mögulegt sé að bankarnir muni á endanum sitja uppi með glæsiíbúðirnar. Þá segir hann Dag bera höfuðábyrgð á þróun íbúðabyggingar í Reykjavík og borgarstjórinn sé „pólitískur dauðans matur sem enginn mun hafa lyst á innan skamms.“

Gústaf bætir svo í: „Hann er gangster og það kæmi mér ekki á óvart þótt drengurinn sá yrði fyrsti stjórnmálamaðurinn til þess að lenda í fangelsi fyrir spillingu, eða á ég að segja gjörspillingu?“