Stefán Eiríksson borgarritari hefur ritað mjög harðorða grein í Facebook-hóp borgarstarfsmanna þar sem hann sakar borgarfulltrúa minnihlutans um aðför að starfsmönnum borgarinnar. Stefán skrifar meðal annars:
„Undanfarna mánuði hafa fáeinir borgarfulltrúar ítrekað vænt starfsfólk Reykjavíkurborgar um óheiðarleika og vegið með ýmsum öðrum hætti að starfsheiðri þeirra. Þetta hefur verið gert beint og óbeint, orðum verið beint að nafngreindum sem og ótilgreindum starfsmönnum, starfsmannahópum, einstaka nefndum og fjallað um einstaka starfsstaði með niðrandi og niðurlægjandi hætti. Gert hefur verið lítið úr störfum þeirra, hæðst hefur verið að þeim verkefnum sem viðkomandi starfsmenn sinna, þeir jafnvel vændir um óheiðarleika og hafa í störfum sínum einhvern annan tilgang en að sinna hverju því verkefni sem viðkomandi hefur verið falið af fagmennsku og heiðarleika.
Og fáeinir borgarfulltrúar hafa ekki látið þar við sitja heldur jafnframt vegið að einstaklingum, stofnunum og fyrirtækjum sem unnið hafa með eða fyrir Reykjavíkurborg með sama hætti.“
Stefán segir þessa hegðun viðkomandi borgarfulltrúa til skammar. Hann segir starfsfólk borgarinnar ekki hafa vettvang til að bera hönd yfir höfuð sér. Stefán segir mikilvægt að bregðast við hegðun sem þessari og gera athugasemdir við hana. Pistill hans endar á þessum orðum:
„Það er nefnilega komið nóg.“
RÚV greindi frá.