Almannatengillinn Friðjón R. Friðjónsson er harðorður vegna þeirrar stöðu sem komin er upp hjá aðilum vinnumarkaðarins. Friðjón hikar ekki við að skella skuldinni á verkalýðshreyfinguna og segir að enginn vilji sé hjá forsvarsmönnum VR og Eflingar til að ná samningum. Segir hann jafnframt að enginn hafa þorað í mótframboð gegn Ragnari Þór Ingólfssyni formanni VR af ótta við árásir og ófrægingu. Friðjón skrifar um þetta eftirfarandi pistil:
Það kemur nákvæmlega ekkert á óvart að viðræðum hafi verið slitið í dag. Það hefur aldrei verið ætlun forsvarsmanna VR og Eflingar að ná samningum. Það er barnaskapur að halda að slíkt sé hægt, markmið þeirra eru ekki betri kjör félagsmanna heldur upplausn, óreiða og átök. Það ömurlegt að enginn bjóði þeim byrginn. Þegar ég spurðist fyrir um hvers vegna enginn bauð sig fram til formanns VR var viðkvæði þeirra sem íhuguðu framboð að enginn vildi gangast undir þær svívirðingar og ofbeldi sem viðbúið var að Gunnar Smári Egilsson og skósveinar hans í verkalýðsfélögunum tveimur myndu ausa yfir viðkomandi. Staðreyndin er að ofbeldismennirnir hafa allt dagskrárvald á Íslandi í dag.