Ragnar Þór Ingólfsson, formaður VR, brást hart við fréttum um að Almenna leigufélagið hefði hækkað húsaleigu mikið með stuttum fyrirvara. Hótaði hann að taka eign VR úr sjóðum Kviku banka ef félagið fjárfesti í GAMMA sem rekur Almenna leigufélagið. Almenna leigufélagið hefur nú rétt Ragnari Þór sáttahönd og vill fá hann til fundar við sig um málefni leigumarkaðarins. Tilkynning Almenna leigufélagsins um þetta er eftirfarandi:
Formaður VR meira en velkominn í heimsókn
Það væri okkur sönn ánægja ef Ragnar Þór Ingólfsson, formaður VR, sæi sér fært að kíkja í kaffi til okkar á morgun og fara yfir málin. Við höfum að mörgu leyti sömu sýn á leigumarkaðinn og hann – teljum afar brýnt að byggja upp félagslegt leiguhúsnæði og óhagnaðardrifin félög á borð við Bjarg, Búseta og Félagsstofnun stúdenta – þó að við teljum að fleiri rekstrarform séu einnig nauðsynleg.
Einkarekin leigufélög hafa, eins og dæmin sanna frá grannlöndum okkar, hlutverki að gegna á fjölbreyttum leigumarkaði þar sem margir kjósa að leigja frekar en eiga, þótt ekki sé um niðurgreidda leigu að ræða.
Við getum vonandi átt uppbyggilegar umræður um hvernig hægt er að byggja upp hagkvæman og fjölbreyttan leigumarkað til framtíðar.