Stefán Ólafsson, félagsfræðiprófessor við Háskóla Íslands og sérfræðingur hjá Eflingu, hefur fjallað mikið um skattamál á Íslandi í gegnum tíðina. Hann gagnrýnir skattalækkun ríkisstjórnarinnar í pistli á Eyjunni og segir mun meira svigrúm vera til staðar, þrátt fyrir staðhæfingar um hið gagnstæða. Segir hann ríkið skulda launafólki miklu meira en breytingarnar geri ráð fyrir.
Stefán segir að ríkið hafi þegar sparað sér 14,1 milljarða útgjöld með niðurskurði vaxtabóta einna, frá árinu 2011 – 2017, á föstu verðlagi, en heildarkostnaðurinn við fyrirhugaðar skattabreytingar er um 14,7 milljarðar króna:
„Frá 2012 til 2017 lækkaði ríkið útgjöld til barnabóta um 1,2 milljarða (á föstu verðlagi). Samtals tók ríkið 15,3 milljarðaút úr þessum bótaflokkum eftir 2011. Að auki hefur ríkið fært um 12 milljarða skattbyrði af tekjuhæstu 20 prósentunum yfir á þau 80 prósent sem lægstar tekjur hafa á árunum 2012 til 2016 (sjá hér). Þetta ætti auðvitað að færa til baka, með hærri álögum á hátekjur og fjármagnstekjur. Alls eru þetta 27,3 milljarðar – og þá er ekki allt talið. Því til viðbótar er ríkið með 29 milljarða afgang á fjárlögum. Svigrúmið er því miklu meira en 14,7 milljarðar – eða að minnsta kosti 56,3 milljarðar.“
Þá nefnir Stefán að ríkið hafi sparað sér tæpa 20 milljarða í húsnæðisstuðning á sex árum:
„Ef einungis er litið á hve mikið ríkið hefur tekið út úr húsnæðisbótum (vaxtabótum og húsaleigubótum samanlagt) þá voru það tæpir 20 milljarðar frá 2011 til 2017. Ríkið tók tæpa 20 milljarða út úr húsnæðisstuðningi við heimilin Ríkið er ekki einu sinni að skila því til baka sem það hefur tekið aukalega af lægri og milli tekjuhópunum á síðustu árum.“