Samkvæmt Hagstofu Íslands hefur stofnunin engar upplýsingar um tekjur af lax- og silungaveiði hér á landi. Vestfirski netmiðillinn Bæjarins besta (BB) greinir frá þessu í dag.
Þar segir að BB hafi leitað upplýsinga hjá Hagstofu Íslands um tekjur af veiðihlunnindum, lax- og silungsveiði í október í fyrra, en fengið þau svör að samantekt yfir tekjur slíkra veiða væru hvergi til, eftir því sem best væri vitað. Nefnt var að sala veiðileyfa teldist sem „leiga á landi“ og væri ekki virðisaukaskattskyld.
Í svari Hagstofu Íslands var þó tekið fram að þetta væri áhugaverð fyrirspurn og að athugað yrði hvað finna mætti á ársreikningum og skattagögnum veiðifélaga.
Bæjarins besta lagði fram aðra fyrirspurn tveimur mánuðum síðar og fékk þá eftirfarandi svör:
„Veiðifélög eru ekki skyldug til að skila ársreikningum þannig að þau gögn eru yfirleitt ekki til staðar. Þannig að því miður erum við með ansi lítið af gögnum um þess háttar starfsemi.“
Bent var á skýrslu Hagfræðistofnunar Háskóla Íslands um virði lax- og silungsveiða, sem kom út í október og Eyjan greindi frá. Þar kom fram að stangveiðimenn hefðu árið 2018 greitt alls 4,9 milljarða króna fyrir veiðileyfi hér á landi og að tekjur veiðifélaga hafi verið um 2,8 milljarðar króna.
Segir í skýrslunni að tekjur af stangveiði séu ein af meginstoðum landbúnaðar hér á landi, eða 28 prósent af hagnaði og launakostnaði. Alls renna 50-62 þúsund íslendinga fyrir lax eða silung og um 3400 veiðibýli eiga veiðirétt.
Sjá nánar: Stangveiðimenn greiddu 4,9 milljarða fyrir veiðileyfin – Verðmætið sagt 170 milljarðar