Kjarvalsstofa er nafn á 40 fermetra stúdíóíbúð/vinnustofu í hjarta Parísar sem landsmenn geta sótt um að fá leigða í tvo mánuði fyrir um 152 þúsund krónur, eða 76 þúsund krónur á mánuði.
Íbúðin er auglýst til útleigu á vef Reykjavíkurborgar og er hún sögð ætluð til dvalar fyrir listamenn. Hægt er að fá íbúðina/vinnustofuna leigða á tímabilinu 2. ágúst 2019 til 27. júlí 2020.
Íbúðin er hluti af alþjóðlegu listamannamiðstöðinni Cité des Arts, sem staðsett er í miðborg Parísar, skammt frá Notre Dame dómkirkjunni. Er íbúðin í umsjá Reykjavíkurborgar og mennta- og menningarmálaráðuneytisins en opið er fyrir umsóknir til 15. mars.
Skila þarf inn greinargerð til stjórnar Kjarvalsstofu þar sem fram kemur lýsing á unnu verkefni og afrakstri dvalarinnar.
París þykir með dýrari borgum heims og er leigan á íbúðinni því ansi hófleg, ekki síst ef hún er borin saman við leiguverð í Reykjavík, sem er með hæsta móti og vandséð að hægt sé að fá heila 40 fermetra fyrir 76 þúsund á mánuði eins og staðan hefur verið undanfarin ár.
Fyrir 75 þúsund krónur á mánuði má til dæmis fá átta fermetra herbergi í Hlíðunum, þannig að listamennirnir sem veljast til Kjarvalsstofu ættu að eiga fyrir café au lait bolla og froskalöppum einnig.
Í því ljósi er vert að minnast þess að um þessar mundir standa margar glænýjar lúxusíbúðir tómar í miðbænum, sem seljast ekki þrátt fyrir að þær séu komnar á verð sem er undirbyggingarkostnaði.
Á meðan er fasteigna- og leigumarkaðurinn í algerum hnút vegna lítils framboðs af litlum og ódýrum íbúðum.
Sjá nánar: Vigdís um lúxus-landkynninguna:„Væri fyndið – ef þetta væri ekki svona sorglegt“
Sjá nánar: Leiguverð hækkaði meira en íbúðaverð
Sjá nánar: Leiguverð hækkar á sama tíma og íbúðaverð lækkar
Sjá nánar: Leiguverð í Reykjavík hærra en í höfuðborgum nágrannalanda
