Á vefmiðlinum Miðjunni birtist í morgun frétt þess efnis að Már Guðmundsson muni láta af störfum sem bankastjóri Seðlabankans á þessu ári og Lilja Alfreðsdóttir, mennta- og menningarmálaráðherra, muni taka við starfinu. Lilja er hagfræðingur að mennt og starfaði áður í Seðlabankanum og hjá Alþjóðagaldeyrissjóðnum.
Í viðtali í Silfrinu hafnar Lilja þessum fréttum. Hún segist sitja í einu mikilvægasta embætti þjóðarinnar, sem mennta- og menningarmálaráðherra, þar sem hún sé að fást við gríðarlega spennandi verkefni og hún ætli að sitja í því embætti út kjörtímabilið.
Í viðtalinu var Lilja einnig spurð út í fjölmiðlafrumvarpið nýja sem nú liggur fyrir Alþingi og gerir ráð fyrir fjárstuðningi hins opinbera við einkarekna fjölmiðla. Lilja segir að rekstrarumhverfi einkarekinna fjölmiðla hafi mjög versnað vegna tækniþróunar. Með frumvarpinu sé þessi vandi viðurkenndur og reynt að ná utan um hann að einhverju leyti.