Inga Sæland, formaður Flokks fólksins og þingmaður, fékk ekki boð frá borgarstjóra um að sitja samtalsfund þingmanna og borgarfulltrúa sem hófst núna seinnipartinn. Frá þessu greinir hún á Facebook nú síðdegis.

Segir hún um mismunun að ræða og mótmælir slíkum vinnubrögðum harðlega:

„Í þessum skrifuðu orðum, er nýhafinn fundur í Höfða í boði Dags B. Eggertssonar borgarstjóra. Þetta mun vera samtalsfundur þingmanna og borgarfulltrúa. Allir sitjandi þingflokkar á Alþingi Íslendinga hafa fengið slíkt boð fyrir utan Flokk fólksins. Hér með mótmæli ég þessum vinnubrögðum harðlega. Það finnst engin afsökun fyrir þessari mismunun. Flokkur fólksins á bæði fulltrúa á þingi og í borgarstjórn.
Ég er kjördæmakjörinn þingmaður í Reykjavíkurkjördæmi suður og sætti mig ekki við svona framkomu.“