„Mér skilst að ég eigi í fyrirtæki, óbeint, sem heitir Landsbankinn hf. Í fyrirtækinu mínu situr stjórn. Hún taldi rétt að hækka mánaðarlaun forstjórans samtals um 1700 þúsund kr. á innan við ári, eða úr 2,1 milljón í 3,8 milljónir.“

Þetta segir Heimir Karlsson, hinn vinsælasti þáttastjórnandi Í bítið á Bylgjunni, í stuttum pistli á Facebook þar sem hann gagnrýnir risa launahækkanir Lilju Einarsdóttur, Landsbankastjóra, en umræða um laun hennar hafa verið eitt hitamál vikunnar. Þau hækkuðu í tvígang á innan við ári, um alls 82 prósent, eð 1,7 milljónir á mánuði. Flestir hafa lýst yfir hneykslun sinni, þar á meðal forsætisráðherra og fjármálaráðherra, sem hefur kallað eftir skýringum, enda er það yfirlýst stefna yfirvalda, sem eiga bankann, að launahækkanir ríkisforstjóra séu hóflegar.

Heimir Karlsson er afar ósáttur og segir:

„Þessi hækkun er rúmar 20 milljónir kr. á ári!!!“

Heimir bætir við og er afar ósáttur:

„Hefur bankinn skilað svona rosalega góðum árangri eða hver eru raunveruleg rökin? Ég tala nú ekki um taktleysið miðað við ríkjandi ástand undanfarin misseri? Ber þetta vott um skynsemi eða hálfvitagang? Annaðhvort og ekkert þar á milli. Er stjórnin að sýna með þessu að hún beri hag bankans fyrir brjósti og þar með hag okkar eigenda bankans?“ spyr Heimir og bætir við að lokum:

„Ef hún getur ekki sýnt fram á það, ætti hún að víkja.“