Evrópa er að molna í sundur fyrir augunum á okkur, segir í opnu bréfi sem 30 menntamenn, rithöfundar og Nóbelsverðlaunahafar birta í nokkrum víðlesnum dagblöðum álfunnar í dag.
Meðal þeirra sem skrifa undir bréfið eru rithöfundarnir Milan Kundera, Salman Rushdie, Ian McEwan, Svetlana Alexievitsj, Hertha Müller, Ismail Kadare, Elfride Jelinek, Mario Vargas-Llosa, David Grossman, Leila Slimani, Jens Christian Grøndahl, Bernard Henry-Levy, Colm Toibin og Anne Applebaum.
Bréfið er bæði viðvörun og herhvöt.
Það er varað við falsspámönnum og lýðskrumurum sem ali á hatri og andúð í nafni þjóðrembu. Því miður sé Evrópa að glata bandalagsþjóðum sem hafi tvívegis komið álfunni til bjargar – Bandaríkjunum og Bretlandi. Núverandi íbúar í Kreml stundi frekleg afskipti í málefni álfunnar. Hugmyndin um Evrópu sé að leysast upp fyrir augum okkar.
Það sé sérstakt áhyggjuefni að í þessu andrúmslofti verði kosið til Evrópuþingsins í maí næstkomandi. Þessar kosningar gætu endað með skelfingu, segir í bréfinu. Þeir sem vilja Evrópu feiga gætu orðið sigurvegarar. Fyrir þá sem trúi á arfleifð Dantes, Erasmusar, Goethes og Comeniusar sé vart annað í sjónmáli en afhroð. Stjórnmál þar sem ríkir óbeit á menntum og menningu geti farið með sigur af hólmi.
Greinarhöfundar segjast ekki vilja sætta sig við slíkan ósigur. Þeir segjast tilheyra hópi evrópskra ættjarðarvina – hann sé miklu fjölmennari en almennt sé talið en hann sé oftast of þögull og hógvær. Menn þurfi að skilja hvað er í húfi – 30 árum eftir fall Berlínarmúrsins sé aftur barist um siðmenninguna.
30 menningarnir hvetja fólk til að hefja aftur á loft merki Evrópu, sem þrátt fyrir ótal mistök og skort á kjarki sé enn leiðarljós fyrir frjálsa karla og konur hvarvetna í heiminum. Það þurfi að hefja á ný baráttu fyrir hugmyndinni um Evrópu ella sætta sig við að hún glatist undir bylgjum pópúlisma.