Stjórn Hagfræðistofnunar Háskóla Íslands hyggst boða til sérstaks fundar á morgun vegna útgáfu hinnar umdeildu skýrslu stofnunarinnar um þjóðhagsleg áhrif hvalveiða sem kom út í síðustu viku. Þetta staðfestir Daði Már Kristófersson, formaður stjórnar HHÍ, við Fréttablaðið.
„Það hafa náttúrulega komið athugasemdir við það hvernig að skýrslan var unnin sem er ástæða til að stjórnin skoði og ræði,“
segir Daði Már.
Oddgeir Á. Ottesen, hagfræðingur vann skýrsluna að mestu leyti en hann er fyrrverandi varaþingmaður Sjálfstæðisflokksins. Skýrslan hefur verið harðlega gagnrýnd og eru aðferðir og ályktanir sagðar vafasamar, ekki síst sá kafli er fjallar um áhrif hlýnun sjávar á vistkerfi hafsins, en ályktanir þar um eru byggðar á vísindagreinum sem eru yfir 20 ára gamlar.
Náttúrufræðistofnun Íslands og Hafrannsóknarstofnun eru meðal þeirra sem gagnrýna skýrsluna. Sú fyrrnefnda segir misskilnings gæta varðandi stöðu hvala á válista, en í skýrslunni segir að ef stofnar hrefnu og langreyðar væru 40 prósent minni, væri hægt að auka verðmæti aflans um á annan tug milljarða árlega. Þetta gagnrýnir Náttúrufræðistofnun, og segir að ef slík fækkun yrði, breytti það stöðu langreyðar á válista og tegundin yrði metin í hættuflokk við Ísland:
„Til að setja hlutföllin í tölulegt samhengi þá þýðir framangreint að veidd yrðu allt að 16.000 dýr.“
Landvernd og Náttúruverndarsamtök Íslands hafa einnig gagnrýnt skýrsluna. Landvernd krafðist þess að skýrslan yrði dregin til baka og unnin upp á nýtt, þar sem stuðst hafi verið við úrelt gögn og þá hafi náttúruverndarsamtökum verið líkt við hryðjuverkasamtök, en í skýrslunni segir:
„Benda má á að mörg lönd í heiminum hafa sett sérstök lög til að vinna gegn uppgangi hryðjuverkasamtaka. Ef til vill er tilefni til slíkrar lagasetningar á Íslandi.“
