Stjórn Landverndar mótmælir harðlega málflutningi sem fram kemur í  nýrri  skýrslu  Hagfræðistofnunar Háskóla Íslands um hvalveiðar. Er farið þess á leit að skýrslan verði dregin til baka, þar sem fráleitt sé að líkja náttúruverndarsamtökum við hryðjuverk og vistfræðilegar forsendur séu úreltar.

„Í fyrsta lagi eru þær forsendur sem skýrsluhöfundur gefur sér í útreikningum sínum af vistfræðilegum toga og þar með langt utan hans fagsviðs. Margir vistfræðingar telja þessar forsendur úreltar. Í öðru lagi er fráleitt að spyrða saman náttúruverndarsamtök og hryðjuverk almennt og ekki síst í „faglegri“ skýrslu sem fjallar um hvalveiðar, hvað þá að hvetja til lagasetningar um hryðjuverk í samhengi við baráttu fyrir verndun umhverfisins. Raunveruleg hryðjuverk beinast að því að drepa almenna borgara í þágu tiltekins málstaðar. Barátta náttúruverndarsamtaka er friðsamleg. Í þriðja lagi er sú ógn sem að okkur steðjar vegna rányrkju manna raunveruleg og þessi ógn kristallast í baráttu náttúruverndarsamtaka fyrir verndun hvala,“

segir í tilkynningu frá stjórn Landverndar, sem fer fram á að skýrslan verði dregin til baka og hún unnin upp á nýtt í samráði við vistfræðinga.

Skýrslan hefur vakið miklar deilur en í henni kemur fram að það sé þjóðhagslega hagkvæmt að halda áfram hvalveiðum og skynsamlegt gæti verið að skilgreina fleiri hvalategundir sem nytjastofna. Þá er einnig lagt til að strangari reglur verði settar um hvalaskoðun, til að tryggja að þeir verði fyrir sem minnstri truflun og hafi ekki áhrif á fjölda þeirra á skoðunarsvæðum.