Ragnar Þór Ingólfsson, formaður VR, segir aðeins sextán prósent landsmanna treysta lífeyrissjóðunum. Þetta fullyrti hann í Bítinu á Bylgjunni í morgun og segir að það sé komin krafa frá VR, Verkalýðsfélagi Akraness og Eflingu um að fari fram gagnger úttekt.

Að sögn Ragnars hafa stéttarfélögin þrjú farið fram á þessa endurskoðun við stjórnvöld en engin svör hafa borist enn. Segir hann að um sautján prósent fólks hafi borið traust til lífeyrissjóðanna árið 2016 og þykir honum sláandi að talan hafi farið minnkandi.

Ragnar telur kerfið vera offjármagnað, auk þess að vera of íþyngjandi fyrir bæði atvinnurekendur og launþega. Þá sé sterk eignastaða lífeyrissjóðanna í fyrirtækjum landsins og arðsemiskrafa þeirra þar ekki til bóta fyrir lífskjör almennings.

„Gjaldtaka í alls kyns sjóði eins og lífeyrissjóðina er orðin allt of há. Hún er orðin íþyngjandi fyrir lífskjör almennings frá degi til dags. Bæði það sem snýr að því að hækka iðgjöldin í lífeyrissjóðakerfinu. Þá verður alltaf minna og minna til að lifa af á. Svigrúm fyrtækja til að borga hærri laun minnkar að sama skapi,“

segir Ragnar.