Tómas Guðbjartsson, læknir, gagnrýnir aðferðafræðina við markaðssetningu rafrettna, en hann birtir mynd af vörum tengdum rafrettum í sjoppu í Mosfellsbæ og nefnir að fjórðungur framhaldsskólanema noti rafrettur daglega:

„Ég ætla að hætta mér inn í umræðuna um rafsígarettur – með mynd sem ég tók í sjoppu í Mosfellsbæ. Þessar umbúðir segja allt um aðferðafræðina við markaðssetningu rafrettna og markhópinn, enda notar nú fjórðungur framhaldsskólanema rafrettur daglega. Er það í lagi? Hversu mörg af þessum ungmennum munu ánetjast nikótíni og byrja að reykja síðar á ævinni?“

segir Tómas og viðurkennir að margir hafi náð að hætta að reykja með því að nota rafrettur, sem sé jákvætt:

„…en það réttlætir ekki svona markaðssetningu. Og ekki segja mér að sú ánægjulega staðreynd að aðeins 4% framhaldsskólanema reyki sígarettur daglega sé vegna rafrettna. Sú jákvæða þróun hófst áður en rafrettur tröllriðu markaðnum.“