Óhætt er að fullyrða um að Brynjar Níelsson, þingmaður Sjálfstæðisflokksins, sé yfirlýstur óvinur pólitíska rétttrúnaðarsamfélagsins, enda nokkuð gjarn á að hneykslast yfir hverskyns hneykslunargirni annarra í hinum ýmsu álitamálum, sem teljast til hneykslis.

Í dag segist Brynjar ekki ætla að tjá sig sérstaklega um þá ákvörðun Seðlabanka Íslands að setja nektarmálverk í geymslu, eftir að starfsmaður kvartaði yfir því síðasta sumar, hversu ósæmilegt það væri. Kom kvörtunin í kjölfar #metoo herferðarinnar.

Brynjar segir þó að engin þurfi lengur að bera ábyrgð á sjálfum sér og engin megi lengur upplifa óþægindi:

„Ekki ætla ég að tjá mig sérstaklega um stóra málverkamálið í Seðlabankanum. En það er bara eitt mál af mörgum af sama meiði, sem er að allir eigi að vera lausir við hvers kyns óþægindi. Börn eiga ekki að bera ábyrgð á hegðun sinni og aldrei upplifa vanlíðan. Fólk á ekki að bera nokkra ábyrgð á heilsu sinni og því má ekki segja við alltof feita fólkið að offita sé bæði skaðlegt fyrir það og skattgreiðendur. Aðeins neytendur nikótíns mega fá það óþvegið. Ég veit ekki hver ástæðan er, en þessi meðvirkni, viðkvæmni og hneykslunargirni er komin út fyrir öll eðlileg mörk myndi einhver segja.“

Sjá einnig: Nektarritskoðun fær harða útreið:„Hver kannast ekki við mánaðarlegar orgíur peningastefnunefndar“