„Kæru vinir ég sé að margir hafa verið að tjá sig um kjaramálin í dag. Ég hef ekki verið vanur að tjá mig um kjaramálin á þessum vettvangi en mér blöskrar bullið frá áróðursmaskínu SA í dag.“
Þetta segir Stefán Sveinbjörnsson, framkvæmdastjóri VR. Stefán segir að staðreyndin sé sú að tilboð Samtaka atvinnulífsins sé tilboð um kaupmáttarrýrnun fyrir flesta félagsmenn VR, sé miðað við verðbólguspá Hagstofunnar. Stefán birtir mynd á Facebook í gærkvöldi máli sínu til stuðnings sem má sjá hér neðst í fréttinni.
Ragnar Þór Ingólfsson, formaður VR, lýsti því yfir í gær að fullyrðingar Samtaka atvinnulífsins um að krafa verkalýðshreyfingarinnar fæli í sér 60 ti 85 prósenta hækkun á öll laun væru fjarstæðukenndar og varla svaraverðar. Tilboð Samtaka atvinnulífsins fælu í sér kjararýrnun.
Sjá einnig: Ragnar Þór leggur spilin á borðið: „Sturlað viðhorf viðsemjenda okkar“
Stefán er sama sinnis og bendir á að í launakröfum VR væri gerð krafa um árlega krónutöluhækkun upp á 42 þúsund krónur á mánuði á þremur árum; 2019, 2020 og 2021.
„Það er augljóst að þegar farið er í prósentureikning, eins og margir gera þessa dagana, þá má fá út mjög háa prósentutölu á lægstu launin sérstaklega þegar tölur til þriggja ára eru lagðar saman. En staðreyndin er að þegar krafa VR er reiknuð sem prósenta á öll laun félagsmanna VR, svokallað kostnaðarmat, þá fæst út að laun myndu hækka að meðaltali um 7,9% árið 2019, 7,3% árið 2020 og 6,7% árið 2021. Þess má geta að í fjárlögum fyrir árið 2019 gera stjórnvöld ráð fyrir að meðalhækkun launa verði 6%,“ segir Stefán.