Ólafur Þór Gunnarsson, þingmaður VG, fullyrti í ræðustól Alþingis í gær að ríkisstjórnin hefði hækkað frítekjumark vegna atvinnutekna elli- og örorkulífeyrisþega úr 25 þúsund krónum í 100 þúsund krónur.
„Þetta er rangt,“ segir Öryrkjabandalag Íslands í tilkynningu og nefnir að frítekjumarkið hafi verið óbreytt frá árinu 2009:
„Ríkisstjórn Vinstri-grænna, Sjálfstæðisflokksins og Framsóknarflokksins, sem setið hefur í rúmt ár, hefur ekki hækkað frítekjumark örorkulífeyrisþega. Frítekjumark örorkulífeyrisþega hefur staðið í stað í áratug. Um þetta er meðal annars fjallað í umsögn ÖBÍ um frumvarp sem kom fram á Alþingi fyrir ári, um afnám skerðingar ellilífeyris vegna atvinnutekna.
„Frítekjumarkið hefur verið óbreytt frá árinu 2009. Á meðan frítekjumarkið stendur í stað og laun á vinnumarkaði hækka, þá skila launahækkanir sér ekki til örorkulífeyrisþega.“
Í umsögninni kemur jafnframt fram að frítekjumarkið er nú um 110 þúsund krónur á mánuði. Hefði það hækkað í samræmi við hækkun launavísitölu frá árinu 2009 ætti það að nema rúmum 200 þúsund krónum á mánuði.“
Þá bendir ÖBÍ á að stór hópur örorkulífeyrisþega þurfi enn að glíma við „grimmar“ skerðingar sem haldi fólki í fátæktargildru:
„Þetta er krónu-á-móti-krónu skerðingin, sem gerir fólki með skerta starfsgetu nánast ókleift að bæta sinn hag, til dæmis með hlutastarfi. Við hverja einustu krónu sem fólk vinnur sér inn eða hefur í lífeyristekjur, er örorkulífeyrir skertur að fullu á móti. Þingmanninum og ríkisstjórn hans yrði sómi að því að hækka frítekjumark atvinnutekna örorkulífeyrisþega upp í 200 þúsund og afnema krónu-á-móti-krónu skerðinguna strax. Þá hefði þingmaðurinn og ríkisstjórnin eitthvað til að stæra sig af.“