Fréttablaðið skýrir frá þessu í dag og hefur eftir heimildamönnum. Vilhjálmur Birgisson, formaður Verkalýðsfélags Akraness, segir þetta algjörlega af og frá. Hann segir félögin mjög samhent og þau standi og falli með vinnunni í þessum viðræðum.
Fréttablaðið segir að Verkalýðsfélag Akraness og VR hafi sameiginlega hagsmuni af að ræða vexti, verðtryggingu, vísitölu og húsnæðismál en Efling þurfi að semja um kjör hinna lægst launuðu. Verkalýðsfélag Grindavíkur er sagt vera á svipuðum nótum og Efling í þessum efnum.
Fréttablaðið hefur eftir Vilhjálmi að fundur forsetateymis ASÍ með stjórnvöldum á morgun geti haft úrslitaáhrif á hvort kjarasamningar nást en félögin fjögur funda næst með Samtökum atvinnulífsins á fimmtudaginn. Verkalýðsfélögin bíða nú eftir útspili stjórnvalda um skattkerfisbreytingar.
Fréttablaðið segir að tillögur um skattkerfisbreytingar geti haft mjög ólík áhrif á félagsmenn félaganna fjögurra og því geti afstaða félagsmanna þeirra til verkfalla verið mismunandi. Blaðið segir að heimildir þess hermi að ólíklegt sé að félagsmenn í VR samþykki að boða til verkfalls. Formaður þess eigi ekki annan kost en að ná samningum þar sem líta megi svo á að hann hafi þegar náð helstu markmiðum félagsins.
