Ragnar Þór Ingólfsson, formaður VR, hefur lengi óskað eftir raunarsögum fólks í samskiptum sínum við leigufélögin hér á landi. Í dag skrifar hann um bréf sem Almenna leigufélagið sendi á fjölskyldu eina og virðist honum ekki skemmt yfir þeim kröfun og skilyrðum sem sett eru fram í bréfinu.
Spyr hann hvort launakröfur verkalýðshreyfingarinnar séu virkilega svo „sturlaðar“ eða hvort það sé kannski samfélagið sem við búum í:
„Nú er Almenna leigufélagið/Gamma/Kvika byrjað að senda sína árlegu hugvekju til viðskiptavina sinna eins og þeir gerðu fyrir 12 mánuðum, 24 mánuðum og 36 mánuðum síðan. Í þetta skipti fékk ég sent afrit af tölvupóstsamskiptum þar sem þeir bjóða „nýjan“ leigusamning sem hækkar um 20 þúsund krónur á mánuði umfram verðbætur á milli ára. Það er ljóst að krafan um 42.000 kr. Launahækkun mun varla duga til að standa undir þessum eina kostnaðarlið hjá þessari fjölskyldu. Fjölskyldan hefur 4 daga til að svara. Hinn valkosturinn er gatan! Eru það það kröfur verkalýðshreyfingarinnar sem eru svona sturlaðar eða samfélagið sem við búum í?“
Þá hvetur Ragnar fólk til að senda sér afrit af bréfum leigufélaganna þar sem farið sé fram á hækkun húsleigu langt umfram það sem „eðlilegt“ geti talist og segist ekki ætla að taka slíkum yfirgangi:
„Við munum ekki taka þessu ofbeldi þegjandi og hljóðalaust.“