Bolungarvíkurbær efndi til samkeppni um útsýnispall á Bolafjalli í fyrra og nú liggja niðurstöður fyrir. Þrjú teymi skiluðu inn tillögum sínum í desember og féll sigurinn í skaut Landmótunar, Argos og Sei fyrir tillögu sína: Bolafjall – út fyrir ystu brún.
Útfærsla þeirra á útsýnispallinum má sjá á myndunum hér að neðan, en hún byggir á því að fjallið sjálft fái að njóta sín sem best og ferðamenn upplifi um leið magnað útsýni að Hornstrandafriðlandinu, Jökulfjörðum, Ísafjarðardjúpi, en í heiðskýru veðri má sjá alla leið til Grænlands segja heimamenn.
Kúlan á myndinni er radarstöðin sem reist var árið 1987, en rekstur hennar hófst árið 1992. Ratsjárstofnun sá um reksturinn fyrir hönd bandaríska varnarliðsins, en nú sér Landhelgisgæslan um rekstur hennar.
Í áliti dómnefndar kemur fram að vinningstillagan sé látlaus en afar sterk hugmynd sem virði umhverfið og beri það ekki ofurliði. Við ysta enda pallsins er áhorfandinn kominn út fyrir ystu brún fjallsins sjálfs og sér því niður þverhnípta fjallshliðina. Munu lofhræddir eflaust halda sig til hlés, en Bolafjall er 638 metra hátt.
„Tillagan uppfyllir markmið samkeppninnar um að gera útsýnisstaðinn á Bolafjalli að eftirsóknaverðum ferðamannastað á Vestfjörðum og þó víðar væri leitað. Hönnun pallsins býr yfir eiginleikum bæði varðandi fagurfræði og staðsetningu til þess að pallurinn verði einstakur í sínum flokki. Hann fellur vel að umhverfinu og endurspeglar í hlutföllum og útfærslu mikilfengleika þess, “
segir á vef Bolungarvíkur.
Það er ljóst að útsýnispallur á Bolafjalli mun verða eitt af helstu kennileitum í ferðaþjónustu á Vestfjörðum og verður án efa einn vinsælasti viðkomustaður ferðamanna á svæðinu og þótt víða væri leitað.