Þetta er stórskemmtileg og furðuleg frétt. Gulvestungar franskir mæta í sendiráð Íslands í Frakklandi og vilja fá að læra af okkur hvernig gera eigi byltingu. Það var víst heldur fátt um svör í sendiráðinu – en sendiherrann sjálfur var ekki við.

Ég skrifaði reyndar lítinn pistil um daginn þar sem sagði frá að sumir gulvestunga telja fyrirmynd sína vera búsáhaldabyltinguna á Íslandi. Í því sambandi nefna þeir ýmislegt sem gerðist hérna eftir hrun.

Í raun væri sniðugast að bjóða hingað sendinefnd gulra vesta. Taka vel á móti þeim. Þeir gætu þá kynnst því hvað við Íslendingar búum við frábært bankakerfi, hvernig ný stjórnarskrá, samin af stjórnlagaþingi, hefur breytt mörgum hlutum, hvað hér er mikil ánægja með félagslega kerfið, hvað skattheimta hér er réttlát – já, hvernig andi byltingarinnar lifir nú þegar tíu ár eru liðin frá því allt fór á annan endann á Austurvelli og þáverandi ríkisstjórn féll.

Þeir gætu svo reynt að bera þetta saman við það sem gengur og gerist í Frakklandi.