Persónuvernd hefur úrskurðað að Reykjavíkurborg, rannsakendur við Háskóla Ísland og Þjóðskrá hafi brotið persónuverndarlög fyrir sveitarstjórnarkosningarnar síðasta sumar með því að senda ungum kjósendum sms þar sem þeir voru hvattir til að kjósa. Úrskurðurinn var birtur á vef Persónuverndar í dag en RÚV greindi frá málinu.

Persónuvernd gerir alvarlegar athugasemdir við framgöngu Reykjavíkurborgar í málinu. Er staðhæft að Reykjavíkurborg hafi aðeins upplýst Persónuvernd um hluta af málinu. Gagnrýnt er að smáskilaboðin hafi verið gildishlaðin og ranglega hafi verið kveðið á um skyldu til að kjósa. Orðrétt er úrskurðurinn svofelldur:

Vinnsla Reykjavíkurborgar og rannsakenda við Háskóla Íslands á persónuupplýsingum frá Þjóðskrá Íslands, sem fólst í að senda mismunandi skilaboð til ungra kjósenda fyrir sveitarstjórnarkosningarnar í maí 2018, samrýmdist ekki lögum nr. 77/2000.

Vinnsla Reykjavíkurborgar á persónuupplýsingum frá Þjóðskrá Íslands, sem fólst í að senda skilaboð til kvenna 80 ára og eldri og erlendra ríkisborgara fyrir sveitarstjórnarkosningarnar í maí 2018, samrýmdist ekki lögum nr. 77/2000.

Vinnsla Þjóðskrár Íslands á persónuupplýsingum sem fól í sér afhendingu upplýsinga til Reykjavíkurborgar um kyn og ríkisfang erlendra ríkisborgara samrýmdist ekki lögum nr. 77/2000.

Ámælisvert er að Reykjavíkurborg hafi ekki veitt Persónuvernd upplýsingar um alla þætti málsins eftir að stofnunin óskaði sérstaklega eftir því með bréfi, dagsettu 14. maí 2018.