„Miðstjórn ASÍ skorar á stjórnvöld að stofna óhagnaðardrifinn samfélagsbanka enda er almenningur langþreyttur á skorti á samkeppni á fjármálamarkaði, miklum kostnaði og háu vaxtastigi hér á landi.“

Þetta segir í tilkynningu frá ASÍ.

Með eignarhlut sínum í ríkisbönkum eru stjórnvöld sögð  í kjörstöðu til að stofna óhagnaðardrifinn samfélagsbanka, þar sem hagsmunir neytenda séu hafðir að leiðarljósi og „skilið sé á milli áhættusækins bankareksturs og almennrar inn- og útlánastarfsemi.“

Telur miðstjórn ASÍ að stofnun slíks samfélagsbanka geti verið mikilvæg leið til að auka heilbrigði fjármálamarkaðar og færa vaxtastig og kostnað nær því sem þekkist í nágrannalöndum.