Svandís Svavarsdóttir heilbrigðisráðherra hefur ákveðið að veita 30 milljónir króna til að sinna eftirliti með því að þjónusta og rekstur heilsugæslustöðva á höfuðborgarsvæðinu sé samræmi við Kröfulýsingu vegna rekstrar heilsugæsluþjónustu. Kröfulýsingin tók gildi í tengslum við breytt fjármögnunarkerfi heilsugæslunnar sem innleitt var í ársbyrjun 2017.

Fjármögnunarkerfið byggist á því að framlög til einstakra heilsugæslustöðva ræðst af samsetningu notendahópsins sem þar er skráður og líklegri þörf hópsins fyrir þjónustu. Ef hlutfall aldraðra er t.d. hátt í þjónustuhópnum, eða hátt hlutfall einstæðra foreldra eða öryrkja hefur það áhrif á fjármögnun stöðvarinnar. Fjármögnunin tekur þannig mið af ýmsum þekktum breytum sem vitað er að hafa áhrif á kostnað við þjónustu heilsugæslustöðva. Í þessu felst að heilsugæslustöð fær meira greitt fyrir sjúkling sem er t.d. aldraður með þunga sjúkdómsbyrði heldur en þann sem er á besta aldri og almennt við góða heilsu.

Í kröfulýsingunni sem gildir jafnt um opinberar og einkareknar heilsugæslustöðvar, eru tilgreindir þeir lágmarksþættir sem falla undir þjónustu heilsugæslustöðva og lýst þeim kröfum sem gerðar eru til rekstraraðila við framkvæmd og útfærslu heilsugæsluþjónustu.

Samkvæmt ákvörðun heilbrigðisráðherra munu Sjúkratryggingar Íslands og Embætti landlæknis annast formlegt eftirlit með því að heilsugæslustöðvar starfi í samræmi við gildandi kröfulýsingu og uppfylli öll skilyrði sem þar eru tilgreind. Helstu þættir eftirlitsins munu felast heimsóknum á heilsugæslustöðvar til að taka út starfsemi þeirra, gerð þjónustukannana, auk þess að rýna og hafa eftirlit með skráningu stöðvanna á gögnum og upplýsingum, ásamt öðum athugunum á innri þáttum starfsemi þeirra.

Sjúkratryggingar Íslands birtu í ágúst 2018 úttektarskýrslu um heilsugæslu á höfuðborgarsvæðinu þar sem fjallað var um reynsluna af breyttu fyrirkomulagi fjármögnunar eftir fyrsta árið frá innleiðingu þess.