„Í samræmi við tækni atómaldar kemur trúboðinn til okkar í nýjustu farþegaþotu Pan American og býr í glæsilegum gistiherbergjum á Hótel Sögu.“
Svo skrifaði dagblaðið Vísir 3. október 1963 um komu hans heilagleika Maharishi Mahesh Yogi til Íslands. Hann hélt fyrirlestur í Stjörnubíói gamla og virðist ekki hafa verið sérlega fjölmennt ef marka má frásögn blaðsins. Verður reyndar að segja að eins og er að blaðamaðurinn hefur mikinn vara á sér gagnvart austrænni speki af þessu tagi.
„Meistarinn byrjaði með því að fara úr klossunum. Síðan settist hann upp á sófann í blómahrúguna, krosslagði fæturna undir sér, tók eitt blómið í hönd sína og hélt stöðugt áfram að handfjatla það undir ræðunni. Menn hlýddu á boðskap hans.Það var hinn venjulegi indverski boðskapur um það, hvernig mætti draga úr spennunni í heiminum með því að hver einstaklingur iðkaði siðgæði og fagrar hugsanir. Í kringum þennan boðskap sagði hann, að stofnuð hefði verið hreyfing, sem kallaðist Andleg endurnýjunarhreyfing. Máli sínu lauk hann svo með því að biðja alla viðstadda að hafa tveggja mínútna þögn til að iðka hugleiðingar. Að því búnu gekk hann á braut og hann og fylgismenn hans stigu upp i bílaleigubílana og óku til Hótel Sögu, en þar er hans heilagleiki reiðubúinn að veita fólki áheyrn. „
Fáum árum síðar varð Maharishi heimsfrægur og vel það. Það var þegar sjálfir Bítlarnir settust við fótskör hans í Rishikesh á Indlandi. Úr því varð reyndar á endanum alls konar vesen, ásakanir um að Maharishi hefði ekki verið jafn skírlífur og hann lést vera og svo um að einhverjir Bítlanna hefðu ekki tekið þetta nógu alvarlega, jafnvel stolist til að nota fíkniefni á hinum helga stað. Lennon samdi lag sem hann kallaði Sexie Sadie um Maharishi og er á Hvítu plötunni.
En þetta varð tími andlegrar leitar og indversk speki komst í tísku um tíma.
Ég kom auga á þessa úrklippu á Facebook hjá Baldri Má Arngrímssyni tónlistarmanni. Baldur benti á að einungis tveimur dögum eftir að Maharishi hélt fyrirlestur sinn í Stjörnubíói hafi hljómsveitin Hljómar verið stofnuð í Keflavík. Það var 5. október 1963. Baldur skrifar:
„Ef þeir hefðu nú verið búnir að stofna bandið aðeins fyrr hefðu þeir kannski mætt í Stjörnubíó og farið síðan til Indlands og þá….“
https://www.youtube.com/watch?v=96zdQ-PGSco