Nýja ríkisstjórnin í Svíþjóð hyggst banna farsíma í skólastofum. Ákvæði eru um þetta í stefnuyfirlýsingu nýju ríkisstjórnarinnar sem tókst loks að mynda með miklum erfiðismunum og var kynnt í gær. Stefan Löfven forsætisráðherra sagði um þetta efni að unnið yrði samkvæmt áætlun um öryggi og ró í skólum – líkt og lesa má á vef SVT.
Áformað er að leggja fram lög um símabannið í haust og gæti það þá tekið gildi í byrjun árs 2021. Þó er gert ráð fyrir að skólastjórnendur og kennarar geti leyft notkun síma í ákveðnum tilvikum – ef nauðsyn krefur.
Ekki er enn komið fram hvort þetta gildir bæði um grunn- og framhaldsskóla, segir í fréttinni.
Bann við notkun farsíma í skólum gekk í garð í Frakklandi í haust – það þykir hafa gefi nokkuð góða raun. Það gildir líka á skólalóðum, enda er eitt markmiðið að reyna að venja börn og unglinga af hinni útbreiddu skjáfíkn.
Net- og hugbúnaðarfyrirtæki stefna sífellt í hina áttina og reyna að hanna leiki, samskiptaform og viðmót sem er ávanabindandi. Það hlýtur að vera eðlilegt að yfirvöld sporni með einhverjum hætti gegn því.