Konu að nafni Björk er gert hátt undir höfði á vef Útvarps Sögu. Björk þessi er nágranni Jóns Baldvins Hanibalssonar, fyrrverandi ráðherra. Í símatíma á Útvarpi Sögu hafa hlustendur tækifæri á að hringja inn. Sjaldgæft er að úr því verði einstakar fréttir en þeir sem stýra vef Sögu töldu að það sem kom fram í samtali Bjarkar og Arnþrúðar ætti enn frekari erindi við lesendur miðilsins. Björk gagnrýndi umfjöllun fjölmiðla og fannst illa vegið að Jóni Baldvini. Arnþrúður gagnrýndi jafnframt fjölmiðla og sagði þá stunda aftökur á fólki.
Björk sagði að henni blöskraði umræðan:
„Það var vitnað í viðtal um að hún (Aldís dóttir Jóns Baldvins) hefði verið svipt sjálfræði. Hvers konar fólk heldur fólk að vinni þarna niður á geðdeild. Þetta er fólk nám að baki að það sé að svipta fólk sjálfræði án nokkurs tilefnis.“
Arnþrúður: Já, nákvæmlega.
Björk: „Svo var tiltekið að hann ætlaði skýlulaus í pott, ég meina, farið bara upp í Landmannalaugar. Farið í gufuböð í Póllandi og þessa staði, hversu margir eru þar ekki skýlulausir og allir geta lent í því að gleyma skýlunni og þurfa uppmála þetta sem einhvern glæp. Ég fæ ekki skilið að það og mér finnst ekki bara í sambandi við Jón Baldvin, heldur marga aðra. Ég er reið. Hvernig var farið með Sigmund á sínum tíma?“
Þarna var nágranninn að vísa til fréttar Stundarinnar þar sem greint var frá því þegar Jón Baldvin, sem þá var skólameistari Menntaskólans á Ísafirði og hefði stungið sér nakinn til sunds með nemendum sínum. Segir í frétt Stundarinnar að hann hafi elt kvenkynsnemendur um laugina og farið á eftir þeim ofan í heitan pott þegar stúlkurnar hefði flúið.
Björk: „Mér finnst skelfilegt hvernig er búið að fara með manninn. Mér finnst hreinlega orðið níðst á honum. Eins og dóttir hans sagði einhver staðar að hún hefði séð kynfærin á pabba sínum, ég segi nú bara sem foreldri, hversu oft hafa börn ekki komið inn á bað og þurft að skreppa á klósettið þegar maður var nýkomin úr baði sjálfur og hversu oft hafa börn séð kynfæri foreldra sinna, tala nú ekki um fimm ára gömul. Ég er ekki að tala um fullorðin börn, enda var þetta smábarn í þessu tilviki.“
Í fréttum Stundarinnar og síðan DV hefur verið vitnað í umfjallanir kvenna sem saka Jón Baldvin um að hafa brotið á sér fyrir áratugum. Nýjustu ásakanirnar eru frá árinu 2018.
Arnþrúður: „Á hvaða leið erum við. Á hvaða leið eru fjölmiðlar. Er þetta blaðamennska að grípa fyrirsögnina. Eitthvað nafn og einhver segir eitthvað og það á að heita blaðamanneska. Eitthvað er haldið fram og haldið fram gagnrýnislaust. Er þetta blaðamennska.
Björk: „Mér finnst þetta ganga út á það að stilla karlmönnum og kvenfólki í tvær andstæðar fylkingar.“
Arnþrúður: Já.
Nýjustu vendingar í málinu er að Jón Baldvin hefur sent frá sér yfirlýsingu. Jón Baldvin segir að þær sögur um meinta kynferðislega áreitni hans sem birst hafa í fjölmiðlum að undanförnum eigi það sameiginlegt að vera ýmist „hreinn uppspuni eða þvílík skrumskæling á veruleikanum, að sannleikurinn er óþekkjanlegur“.
Eftir að Stundin opnaði málið hefur ásökunum fjölgað. Viðtal við Aldísi dóttur hans vakti mikla athygli á Rúv í vikunni en fyrst var getið um kynferðislega áreitni Jóns Baldvins í fréttum fyrir nokkrum árum er í ljós kom að hann hafði skrifað mjög vafasöm bréf til kornungrar frænku sinnar. Í bréfunum lýsti hann meðal annars samförum sínum og eiginkonu sinnar, Bryndísar Schram. Undanfarna daga hefur verið getið um fjölmargar ásakanir á hendur Jóni Baldvini um kynferðislega áreitni í gegnum langt tímabil.
Björk: „Ég veit ekki á hvaða leið við erum. Ég bý í nágrenni við þessi hjón og þetta eru prýðishjón. Prýðis nágrannar og ég hef ekkert nema allt gott um þau að segja. Að vera velta sér upp úr því sem einhver gerði á fylleríi fyrir tuttugu árum fimmtíu árum eða þess þó heldur. Mér er ofboðið. Á hvaða leið erum við. Ef þú gerir einhverja bölvaða vitleysu á fyllerí og sérð eftir því, á þá endalaust að vera strá salti í sárin.“
Arnþrúður: „Þetta er bara þessi nýja aftaka. Þetta er birtingarmynd af aftöku sem ég verð að segja sem ég hef áhyggjur af sem fagmaður, blaða og fréttamaður að ef þetta er það sem koma skal, að það verði heimiluð svona aftaka á fólki í fjölmiðlum án dóms og laga, mér finnst þetta vera algjört ærumorð og þetta er ígildi manndráps. Líf fólks er búið eftir þetta.“
Þá sagði Arnþrúður undir lokin:
„Þetta er skrítin og ógnvekjandi þróun. Þetta er án dóms og laga. Þarna er verið að fara framhjá dómslögum vegna þess að einhverjir fjölmiðlamenn ætla að ganga frá þessum. Ég veit ekki hvernig Klausturfundi þeir halda, það fer að verða eftirsóknarvert að ná upptökum af slíkum fundum.“
