Kevin Stanford tók upp samtal sitt við Magnús Guðmundsson, fyrrverandi bankastjóra Kaupþings í Lúxemborg. Í opnu bréfi sem birt er á vef Kjarnans saka þau Kevin og Karen Millen þá Hreiðar Má Sigurðsson, fyrrverandi forstjóra Kaupþings, um að hafa misnotað traust þeirra með því að nota þau í samsæri með Deutsche Bank til að lækka skuldatryggingarálag Kaupþings.
Sjá einnig: Segja Hreiðar Má og Magnús hafa notað sig í svikamyllu
Á upptökunni hér fyrir neðan má heyra Magnús ræða við Kevin í gufubaði. Hreiðar heyrist segja að ástæðan sé að hann viti að Kevin hafi áður tekið upp samtöl, þá við fyrrverandi samstarfsmenn Magnúsar. Magnús segir við Kevin að hann græði ekkert á því að tala við hann og hann sé ekki að biðja um neitt nema að þegar, eða ef, lögreglan tali við hann þá muni hann segja sannleikann. „Það sem ég er að biðja þig um, ef ég þarf á því að halda, er að þú stingir mig ekki í bakið,“ segir Magnús. „Þannig að, ef það verður sakamál, þá komir þú ekki og segir að Magnús hafi gert hitt og þetta.“
Á þessari upptöku heyrist Magnús tala um samskipti stjórnvalda á Íslandi og í Lúxemborg og Belgíu. Segir Kevin að Magnús hafi sagt við sig á fundi að skilanefnd Kaupþings hafi ákveðið að taka eignir hans og nota þær til að borga skuldir.
Á þriðju upptökunni má heyra þá Kevin og Magnús ræða um minnisblað sem Steinar Þór Guðgeirsson, þá formaður skilanefndar Kaupþings, hafi neitað að skrifa undir. Í minnisblaðinu mun hafa staðið að það væri samsæri um að stela eignum Kevin til að borga skuldir Kaupþings á Íslandi við Kaupþing í Lúxemborg.
Hér má lesa bréf Kevin Stanford og Karen Millen í heild sinni.
Leiðrétting: Í upphaflegu útgáfu fréttarinnar var sagt að Kevin hafi verið að ræða við Hreiðar Má Sigurðsson. Það er ekki rétt. Hann var að ræða við Magnús Guðmundsson. Eyjan biðst velvirðingar á mistökunum.
