Kevin Stanford og fyrrum eiginkona hans, Karen Millen, sem voru meðal stærstu viðskiptavina Kaupþings banka fyrir hrun, birta á Kjarnanum opið bréf til Hreiðars Más Sigurðssonar og Magnúsar Guðmundssonar, fyrrum stjórnenda bankans, hvar þeir eru sakaðir um þjófnað, ýmsa fjárglæfrastarfsemi og að hafa notað þau í „svikamyllu“.
„Við unnum með Kaupþingi frá árinu 2001 og litum á ykkur sem viðskiptafélaga og „vini“. Þann 6. ágúst 2008 misnotuðuð þið ykkur hins vegar traust okkar með því að nota okkur í samsæri með Deutsche Bank til að lækka skuldatryggingarálag Kaupþings. Við vorum nauðsynleg í svikunum eins og lýst er í kröfu gegn Deutsche Bank (skjal 1). Sakamálarannsóknin sem fylgdi í kjölfarið skaðaði orðspor okkar og möguleika okkar til að stunda áfram viðskipti,“
segir meðal annars í bréfinu, hvar vísað er til fjölda gagna og upptaka af samtölum, sem fjallað verður um nánar síðar.
Þar er Magnús einnig sakaður um að hafa keypt skuldabréf í nafni Karenar án hennar vitneskju.
Einnig segir að Hreiðari Má hafi tekist að plata Seðlabanka Íslands til að veita Kaupþingi lán, sem aldrei var borgað til baka og því hafi hann stolið af íslensku þjóðinni. Því sé það kaldhæðnislegt að þjóðin skuli fjármagna hótelin þeirra Hreiðars og Magnúsar, í gegnum ríkisbankana:
„Þann 6. október 2008 tókst þér, Hreiðar, á ótrúlegan hátt að plata Seðlabanka Íslands til að lána Kaupþingi 500 milljón evrur þegar þú vissir að Kaupþing var gjaldþrota; þú notaðir svo 171 milljón evrur af peningum landa þinna til að borga niður skuld Kaupþings í Lúxemborg við Lindsor Holdings Corporation (skjal 9) til að undirbúa yfirtöku þína á Kaupþingi í Lúxemborg (greiðslustaðfesting, skjal 10). Seðlabanki Íslands endurheimti aldrei þessar 171 milljón evrur sem þú millifærðir til Lúxemborgar.“
„Það er líka kaldhæðnislegt að eftir að þið stáluð (171 milljón evrum) af íslensku þjóðinni, sem myndi duga til að borga fyrir nýtt þjóðarsjúkrahús, til að fjármagna hugmyndir ykkar um að kaupa Kaupþing í Lúxemborg, þá heldur íslenska þjóðin áfram að fjármagna hótelin ykkar í gegnum ríkisbankana, Landsbanka og Íslandsbanka. Það er líka ótrúlegt að Stefnir hf., dótturfélag Arion banka (sem áður hét Kaupþing hf.), hafi fjárfest í hótelverkefnum ykkar.“
Þá er tekið fram að þeir Hreiðar Már og Magnús lifi á peningum vegna „Kaupthinking“ sem geymdir séu á leynilegum bankareikningum eiginkvenna þeirra í Sviss.
Að lokum er þeim Hreiðari og Magnúsi boðið að hrekja bréfið:
„Við bjóðum ykkur að hrekja ásakanir okkar, og ef þið getið það ekki, þá virðist það liggja fyrir að í þessu tiltekna tilviki borgi glæpir sig á Íslandi.“