Þórhildur Lóa Þórhallsdóttir, oddviti Viðreisnar og formaður borgarráðs var til viðtals í þættinum Harmageddon í morgun hvar hún ræddi braggamálið meðal annars. Þar sagðist hún treysta borgarstjóra til að leiða þá vinnu til lykta líkt og stefnt væri að.
Þórdís Lóa hefur stigið fram fyrir skjöldu í braggamálinu þegar Dagur B. Eggertsson hefur einhverra hluta vegna ekki treyst sér til þess, en frægt er þegar Dagur komst ekki í Kastljósið vegna flensu, þegar svara átti fyrir braggamálið og Þórdísi Lóa bauðst til að mæta í staðinn, en gat litlu svarað, enda málinu nánast ókunn, þar sem hún og Viðreisn voru ný í borgarstjórn.
Frosti Logason spurði Þórdísi í þættinum hvers vegna hún væri að verja braggamálið, þegar skýrt komi fram í skýrslu innri endurskoðunar að borgarstjóri sé ábyrgur fyrir mörgu á því sem fram fór, seð æðsti yfirmaður borgarinnar, í ljósi þess að hún hafi ekki verið „hugmynd í pólitík“ þegar braggamisferlið hafi verið í gangi.
Því svaraði Þórdís til, að hún væri alls ekki að verja braggamálið:
„Ég er bara alls ekkert í að verja braggann. Mér finnst hann bara afleit framkvæmd.“
Þá var Þórdísi bent á að hún hefði sannarlega varið meirihlutasamstarfið og að Dagur ætti ekki að segja af sér vegna málsins:
„Dagur ber ábyrgð á allri borginni. Hann er æðsti embættismaður allrar borgarinnar. Hann ber ábyrgð á hverri einustu framkvæmd ef þú vilt fara þá leiðina,“
sagði Þórdís þá.
Hildur Björnsdóttir, borgarfulltrúi Sjálfstæðisflokksins, fór fram á að borgarstjóri viki úr þriggja manna nefnd sem samanstóð af borgarstjóra, Hildi og Þórdísi, en nefndin átti að vinna að úrlausnaratriðum braggaskýrslunnar. Sagði Hildur það ekki trúverðugt að borgarstjóri kæmi að málinu, það væri ekki trúverðugt sökum ábyrgðar hans í braggamálinu. Þegar Dagur varð ekki við kröfu Hildar vék hún sjálf úr nefndinni.
Þórdís Lóa segir að eftir 90 mínútna kynningu um skýrsluna hafi Hildur samþykkt að vera í nefndinni að fundi loknum. Hún segir að ákvörðun Hildar um að segja sig síðan úr nefndinni hafi verið vegna þrýstings frá baklandi Sjálfstæðisflokksins, nokkuð sem Hildur hefur áður neitað þegar borgarstjóri viðhafði sömu orðræðu, en fékk bágt fyrir og var hann meðal annars sakaður um kvenfyrirlitningu.
Um þessa ákvörðun Hildar sagði Þórdís:
„Eftir kynninguna kom ekkert nýtt upp. Þannig að það var nú held ég bara þrýstingur úr baklandinu sem gerði það…ég hef mikla trú á Hildi…en ég held að það hafi verið einhver þrýstingur úr baklandinu, ég er eiginlega alveg viss um það,“
sagði Þórdís, en nefndi að Hildur tæki þó alltaf lokaákvörðunina.
Sjá einnig: Dagur borgarstjóri sakaður um kvenfyrirlitningu:„Ekki veit ég hvernig Samfylking kemur fram við sínar konur“