Í gær samþykkti fjárlaganefnd Alþingis að senda beiðni um stjórnsýsluúttekt á málefnum Íslandspósts (ÍSP) til ríkisendurskoðanda. Þetta hefur Fréttablaðið eftir Willum Þór Þórssyni, formanni fjárlaganefndar.
Íslandspóstur hefur þegar fengið 500 milljónir af þeim 1,5 milljarði sem það óskaði eftir í neyðarlánveitingu frá ríkinu fyrir jól, en ströng skilyrði fylgja þeim milljarði sem eftir stendur. Ríkisendurskoðandi segir í umsögn sinni við frumvarp til fjáraukalaga að það sé almennt „óheppilegt“ að ekki liggi fyrir hvernig taka eigi á rekstrarvanda fyrirtækisins og orsök vandans sé ótilgreind, hvort hann stafi af samkeppnisrekstri eða starfsemi innan einkaréttar.
Áhöld voru uppi um meint vanhæfi Ríkisendurskoðunar til verksins, þar sem stofnunin sér um fjárhagsendurskoðun reikninga Íslandspósts. Ríkisendurskoðandi, Skúli Eggert Þórðarson segir að ekki sé um vanhæfi að ræða:
„Fjárhagsendurskoðunin felur meðal annars í sér frágang á reikningum til birtingar og skattlagningar ef um þá er að ræða. Slík vinna felur ekki í sér að lagt sé mat á innri verkefni hlutaðeigandi fyrirtækis eða stofnunar og hvort unnið sé eftir þeim lögum og reglum sem gilda.“